#TITLE=Yamaka-vagga

#N=1
Mano-pubbangama dhamma mano-settha mano-maya
Manasa ce padutthena bhasati va karoti va
Tato nam dukkham anveti cakkam va vahato padam.

#N=2
Mano-pubbangama dhamma mano-settha mano-maya
Manasa ce pasannena bhasati va karoti va
Tato nam sukham anveti chaya va anapayini.

#N=3
Akkocchi mam avadhi mam ajini mam ahasi me
Ye ca tam upanayhanti veram tesam na sammati.

#N=4
Akkocchi mam avadhi mam ajini mam ahasi me
Ye ca tam n'upanayhanti veram tes'upasammati.

#N=5
Na hi verena verani sammant'idha kudacanam
Averena ca sammanti esa dhammo sanantano.

#N=6
Pare ca na vijananti mayam ettha yamamase
Ye ca tattha vijananti tato sammanti medhaga.

#N=7
Subh'anupassim viharantam indriyesu asamvutam
Bhojanamhi c'amattannum kusitam hina-viriyam
Tam ve pasahati maro vato rukkham va dubbalam.

#N=8
Asubh'anupassim viharantam indriyesu susamvutam
Bhojanamhi ca mattannum saddham araddha-viriyam
Tam ve na'ppasahati maro vato selam va pabbatam.

#N=9
Anikkasavo kasavam yo vattham paridahissati
Apeto dama-saccena na so kasavam arahati.

#N=10
Yo ca vanta-kasav'assa silesu susamahito
Upeto dama-saccena sa ve kasavam arahati.

#N=11
Asare sara-matino sare c'asara-dassino
Te saram n'adhigacchanti miccha-sankappa-gocara.

#N=12
Saran ca sarato natva asaran ca asarato
Te saram adhigacchanti samma-sankappa-gocara.

#N=13
Yatha agaram ducchannam vutthi samativijjhati
Evam abhavitam cittam rago samativijjhati.

#N=14
Yatha agaram succhannam vutthi na samativijjhati
Evam subhavitam cittam rago na samativijjhati.

#N=15
Idha socati pecca socati papa-kari abhay'attha socati
So socati so vihannati disva kamma-kilittham attano.

#N=16
Idha modati pecca modati kata-punno abhay'attha modati
So modati so pamodati disva kamma-visuddhim attano.

#N=17
Idha tappati pecca tappati papa-kari ubhay'attha tappati
Papam me katan ti tappati bhiyyo tappati duggatim gato.

#N=18
Idha nandati pacca nandati kata-punno ubhay'attha nandati
Punnam me katan ti nandati bhiyyo nandati suggatim gato.

#N=19
Bahum pi ce samhitam bhasamano na takkaro hoti naro pamatto
Gopo va gavo ganayam paresam na bhagava samannassa hoti.

#N=20
Appam pi ce samhitam bhasamano dhammassa hoti anudhamma-cari
Ragan ca dosan ca pahaya moham samma-ppajano suvimutta-citto
Anupadiyano idha va huram va sa bhagava samannassa hoti.
